حالات حـــب!
اغسطس 19, 2007
واجب وهقتني فيه العزيزة إرور وطلبت مني كتابة 10 حالات حب مررت بها! 10 مرة وحدة… صعب!!!! بس بحاول أعصر مخي!
1- أحب التسوق وايد..فطرة فينا احنا البنات 
2-أحب اجمع أدوات القرطاسية الغريبة…يعني اذا جفت قلم مبتكر او مقلمة غريبة اشتريها على طول…ما استخدمهم بس احب يكونون عندي…!
3-أحب مسلسل Gilmore Girls..قصته تقليدية..تتكلم عن بنت وأمها قريبين من بعض وايد وما يخشون عن بعض شي..يعيشون في إحدى المدن ويواجهون بعض المشاكل بعد افتراقهم…بس السيناريو مو طبيعي…مبتكر ويديد!
4-أحب أسوق السيارة يمكن أكون خوافة شوي في السياقة وحدي 80 ما أزيد بس أستمتع وانا اسوق..لأني احس باستقلاليتي.
5-سيارتي بعد أحبها ومتعلقة فيها وايد…صغيرة وكتكوتة وتدخل بأي داعوس…!
6-طبعا الكمبيوترما أستغني عنه…علاقة حب قديمة بيني وبينه
7- أحب السينابووووووووون…يممممميييي…ودي أعطي اللي اخترعه جائزة نوبل للابداع المطبخي!
اممممممم
خلاص ما عندي شي …تقدرون تدشون صفحة About me اذا تبون اكثر 
اغسطس 19, 2007 at 12:57 م
ايشبنا كلنا موقفين عند رقم 7 !! الظاهر فيه ســـــر *_* < تأثير الأفلام على الفرد
في حبك للسينابون تذكريني ببنت عمي , تمووووووت فيه بشكل مو طبيعي , شبه مدمنة !!
Gilmore Girls !! من زمااان عنه ,, في أي وقت يعرضونه ؟؟
—-
برضووو تعجبيني في ناحية الاجتهاد في حل الواجبات ,,
خليكِ كذا على طوووووووووووول =)
اغسطس 19, 2007 at 2:45 م
انا ايضا احب مشاهدة Gilmore Girls واحب مشاهدة CSI و Scrubs ووووووو يمكن كل المسلسلات الاجنبية ههههههه.
اغسطس 19, 2007 at 2:48 م
جلست اضحك كثييييييييييير على حكاية السنابون.. بصراحه هذا احلى شي في الدنيا خصوصا لما يكون
بالمكسرات..بس يا خسارة جالس اسوي ريجيم ولي اكثر من 4 اشهر مبتعد عن السنابون
اغسطس 19, 2007 at 3:45 م
إرور :
هههههه…هذا تأثير المحقق كونان!
السينابون صار إدمان خلاص وخاصة ريحته اميزها من على بعد ميل…!
الله يسلمك Gilmore Girls يحطونه يوم الأحد الساعة 9 .. على دبي ون < مو كأني اللي في التلفزيون خخخخخخ
طول عمري شاطرة في حل الواجبات
وان شاء الله نظل على هذا المنوال !
اغسطس 19, 2007 at 3:52 م
حميد:
انا بعد اتابع بعض المسلسلات الاجنبية ما عدا CSI فيها اجرام مو طبيعي! بس Gilmore Girls متابعتي له هي التوب!
اغسطس 19, 2007 at 3:55 م
وتر
هههههه طلع للسينابون مشجعين كثار وانا مادري! بس ما اقدر استغني عنه حتى مع الرجيم لا يقاوم
مع تمنياتي برجيم ناجح إن شاء الله !
اغسطس 19, 2007 at 4:49 م
امل انا بتابع CSI لسبب مهم جدا انهم يعتمدون على جمع المعلومات بصورة كبيرة جدا, لا يعتمدون على الافتراض, اهم شئ هو الدليل.
اغسطس 20, 2007 at 2:11 م
هو فعلا طريقتهم في الحل حلوة بس بعد في بعض المشاهد ما احب اشوفها!
اغسطس 21, 2007 at 1:22 م
حالات بعضها غريب !!!
على فكره ما هو السينابون ؟ ؟ ؟ ؟!؟!!
اغسطس 21, 2007 at 2:11 م
استغفر الله ما احب السينابون .. حتى في البيت يسونه عدنا ..أكون ميودة خشمي طول الوقت لوووول ..!!
حالات قربتنا أكثر لشخصيتج : ) !
اغسطس 21, 2007 at 2:24 م
عرفونا يا أهل الخير وش هذا السنابون؟؟
اغسطس 21, 2007 at 3:53 م
عابر سبيل:
أكيد النقطة الثانية اللي استغربت منها!!
السينابون نوع من انواع الفطائر بالدارسين (القرفة ) وينحط من فوقها كريمة ومكسرات
شوف شكله هـــنـــــا
اغسطس 21, 2007 at 4:02 م
دبي:
أنتي أول وحدة اسمعها تقول ما أحب السينابون!! سبحان الله الناس أذواق..
أنا أموت على ريحته وريحة الدارسين عموما
سعيدة بزيارتج
اغسطس 21, 2007 at 4:08 م
أحمد:
هههههههه..هذا اخو الخنفروش!
تقدر تجوفه من هــــنـــــــــا
حياك الله..
اغسطس 22, 2007 at 7:36 م
حتى انا أحب مسلسل غلمور غير >> طيب لا تبكين
كأن الواجب ناقص .!! >> الله يرحم إيام الأبتدائي
انا أحسدك على سيارتك >> عيني عينك الحسد
موفقه أموله
اغسطس 22, 2007 at 9:50 م
لالالا الواجب مو ناقص
مادام الأبلة إرور ما قالت شي يعني خلاص شغلي عدل ! 
شدعوة سيارتي شبح ولا هامر…حسدي علي كيف كيفج ..بس ذكري الله خخخخخخخخ!!
حياج الله فيميل
اغسطس 23, 2007 at 8:13 ص
أها ، يعني كل اللي في الموقع من صور هي سينابونات !
هل لهم فروع في أبوظبي ؟ نبا نجرب ؟ بس أذكر رأيت مثله في كارفور اظن
عالعموم يعطيكم العافية
مقلمة ؟ هواية غريبة !
اغسطس 23, 2007 at 2:53 م
ايووووه هذي منتجات المحل بس انا اللي احبه اللي بالمكسرات..لا يقاوم!
بصراحة ماعندي فكرة اذا موجود في بوظبي…بس اذا تبي تجرب حياك البحرين موجود في مجمع السيف!!
على فكرة المقلمات اللي اشتريهم اوزعهم على أطفال العائلة كهدايا لهم..!
حياك الله
سبتمبر 6, 2007 at 12:43 ص
ilove gilmore girls for ever
سبتمبر 6, 2007 at 11:44 ص
Yes! Go Gilmore Girls
Thanks jess!